迴響—粵語文學期刊（第九期)

商品說明

統籌：鍾卓玲
出版社：scone publishing
出版日期：2021年3月
ISSN：2708-8146
頁數：56
規格：平裝

「唯有愛生憂，唯有愛生怖」，今期嘅主題係「執念」。如果思想有顏色，執念一定係粉紅色，因為人最大嘅執念往往都係喺愛情上。佛家有所謂「貪、癡、嗔」三毒，三樣嘢都喺愛情上有所體現。

貪欲者，欲望也，尤指性欲，亦都包括渴望愛人同被愛嘅欲望。癡者，愚癡無明，正所謂「愛情係盲目嘅」，有冇試過自己愛人愛到對佢嘅缺點視而不見，真相擺喺眼前都不到黃河不心息？當一個人陷入愛情時，往往都只會見到自己想見到嘅嘢。嗔者，瞋恚無忍，有冇試過喺愛人面前特別容易情緒失控？明明前一刻仲想保護對方，長相廝守，結果下一秒傷害得對方最深嘅居然係自己，最愛自己嘅人反而要承受返自己最大嘅惡意。

《LOVED-19》 － 雨田明

你愛一個人可以愛到幾盡呢？司徒迪琛可以為咗自己死咗嘅愛人用70年時間去製造病毒，令感染嘅人一旦諗起愛人就會心臟病發。究竟點解司徒迪琛要噉樣做呢？係乜嘢令佢嗔念咁深泥？

日防夜防，家甴難防 by 馮晞乾

如果要投票選出人類最討厭嘅昆蟲，相信都非曱甴莫屬。有幾多女強人喺職場上春風得意，但係面對曱甴時仍然花容失色？莫講話女人，相信唔少昂藏六尺嘅男子漢見到曱甴，尤其識飛嘅曱甴時，都會嚇咗一跳。點解人類會驚曱甴呢？甚至有啲人會驚到聽到「曱甴」兩隻字都會失晒魂呢？相信呢篇小說可以解答到你嘅問題。

《執着》 － 梁栢堅

「個個都執着，唔通個個都想執着咩？」呢個係我睇完梁栢堅篇文之後嘅第一個諗法。大家身邊一定有位朋友成日勸人唔好咁執着，之但係咩叫執着呢？又點樣先為之唔執着呢？又有人話「人冇夢想，同鹹魚有咩分別？」噉一個唔執着嘅人，同棵鹹酸菜嘅分別又喺邊度呢？

《執念不二》 － 甘仔（好青年荼毒室 – 哲學部）

「做人唔好咁執著」呢句大家都聽得多，但係「執著」究竟係咩嚟，就各有各講法。我哋今次請咗好青年荼毒室嘅甘仔，用佛家角度同我哋講下執念呢樣野同人嘅意識其實係不可割裂，謂之「不二」。

《青春嘅執念》 － 渾水

我哋依家通常叫啲視暗戀嘅女仔為女神，同時唔係好識點同女性相處嘅男仔為毒撚。但係我覺得可以換個文雅啲嘅講法，叫做癡兒。今次渾水就分享咗佢讀書時，作為一個「癡兒」可以有幾癡。

《秒速5厘米 （上）》 － 朱雀軒轅

新海誠嘅《秒速5厘米》相信你未睇過都應該聽過。每個人都應該至少曾經有過一段戀情，就算分開咗都糾纏住自己。今次呢篇文就係同大家用愛情哲學嘅角度去分析一下新海誠喺《秒速5厘米》入面講咗一個點樣嘅愛情故事，以及西方哲學又係點樣睇呢種愛情嘅執念。

仲有其他作者，包括重盧覓雪、洪麗芳、余該隱、薛可正、做金庸的男人、佬訊、葉曉燕、洛林，等等。